NongBee

Wednesday, 06 February 2013 17:05 တၢင်းထႆး မႆႈၸႂ်လွင်ႈၾၢႆၼမ်ႉၵူၵ်း၊ ဢၼ်ၸုမ်းဝႃႉတေၵေႃႇ သၢင်ႈ ႁဵတ်းၶူင်းၵၢၼ်ၾၢႆၾႆးၾႃႉႁႅင်းၼမ်ႉၼိူဝ်မႄႈ ၼမ်ႉၵူၵ်း တီႈပူင်ႇတွင်း၊ ၼႂ်းၸႄႈတွၼ်ႈမိူင်းသၢတ်ႇ။ ၵွပ်ႈႁၼ်ဝႃႈ တေတုမ်ႉတိူဝ်ႉလွင်ႈယူႇသဝ်းၵိၼ်သၢင်ႈၵူၼ်း မိူင်းထႆး။ Mae Nam Koke မႄႈၼမ်ႉၵူၵ်း ဢၼ်လႆလူင်းၼႂ်းမိူင်းထႆးပွတ်းတႃႈတွၼ်း ၸႄႈတွၼ်ႈၵဵင်းမႆႇ ဢိင်ၼိူဝ်ၸုမ်းဝႃႉ (UWSA) တေၵေႃႇသၢင်ႈၾၢႆ တဵင်မႄႈၼမ်ႉၵူၵ်း၊ ပိူဝ်ႈတႃႇႁဵတ်းဢွၵ်ႇၾႆးၾႃႉႁႅင်းၼမ်ႉ တီႈလွႆပူင်ႇတွင်း (ဢၼ်ယၢၼ်လႅၼ်လိၼ်ထႆး မွၵ်ႈ 30 ၵီႊလူဝ်ႊ)၊ ၾၢႆႇၼိူဝ်ဝၢၼ်ႈႁုင်ႈ ၼႂ်းၸႄႈတွၼ်ႈ မိူင်းသၢတ်ႇသေ တၢင်းၸဝ်ႈၼႃႈတီႈ ၾၢႆႇႁူမ်ႇလူမ်ႈဝႃႈ- ပေႃးႁဵတ်းၾၢႆၼႆႉ တၢင်းထႆးမႆႈၸႂ်ဝႃႈတေမႃးတုမ်ႉတိူဝ်ႉ လွင်ႈယူႇသဝ်းၵိၼ်သၢင်ႈ/ ၼႃႈၵၢၼ်ႁႃလဵင်ႉတွင်ႉ ၵူၼ်းမိူင်းထႆးၼႂ်းပွတ်းတွၼ်ႈ 3 ၸႄႈဝဵင်း ဢၼ်မႄႈၼမ်ႉၵူၵ်းလႆလတ်းၽၢၼ်ႇ ႁၢၼ်ႉတေႃႇၵႂႃႇၶဝ်ႈၼမ်ႉမႄႈၶွင်၊ မိူၼ်ၼင်ႇ ၸႄႈတွၼ်ႈၵဵင်းမႆႇ ၼႂ်းၸႄႈဝဵင်းမႄႈဢၢႆ။ ၸႄႈတွၼ်ႈၵဵင်းႁၢႆး ၼႂ်းတူဝ်ၸႄႈဝဵင်းၵဵင်းႁၢႆး လႄႈ ၸႄႈဝဵင်းၵဵင်းသႅၼ် ၸိူဝ်ႈၼႆႉ-ဝႃႈၼႆ။ သင်ဝႃႈၶူင်းၵၢၼ်တဵင်ၾၢႆၼႆႉယဝ်ႉတူဝ်ႈၵႂႃႇၸိုင် မၼ်းၸၢင်ႈပဵၼ်မိူၼ်ၼင်ႇမႄႈၼမ်ႉၶွင်။ မႄႈၼမ်ႉၶွင်ၼႆႉ ဝၢႆးသေၶႄႇႁဵတ်း ၾၢႆတၢင်းၼိူဝ်တီႈမိူင်းၶႄႇယဝ်ႉ ပေႃးထိုင်မႃးၶၢဝ်းႁႅင်ႈ ၼမ်ႉၶွင်ယွမ်းလူင်းၵႂႃႇၼမ်တႄႉတႄႉ၊ ႁဵတ်းႁႂ်ႈႁိူဝ်းၶိုၼ်ႈလူင်းၵႂႃႇမႃး ယၢပ်ႇလူင်လၢင်၊ မၢင်တီႈၼမ်ႉတိုၼ်ႈၼမ်ႉႁႅင်ႈသေၵူၼ်းဝၢၼ်ႈပႆၶၢမ်ႈပေႃးလႆႈ။ ပေႃးတဵင်ၾၢႆမႄႈၼမ်ႉၵူၵ်း ၵူဝ်ပဵၼ်ၸိူင်ႉၼၼ် ထႅင်ႈၵူၺ်းယဝ်ႉ- ၵူၼ်းၵႃႉထႆးတီႈၵဵင်းသႅၼ်ၵေႃႉၼိုင်ႈ လၢတ်ႈၼင်ႇၼႆ။ တၢင်းၸဝ်ႈၼႃႈတီႈၾၢႆႇႁူမ်ႇလူမ်ႈထႆး ဢၼ်ႁူႉလွင်ႈသၽႃဝ/သိင်ႇဝႅတ်ႉလွမ်ႉ ၵေႃႈလၢတ်ႈဝႃႈ- ပေႃးမီးၵၢၼ် သၢင်ႈၾၢႆတၢင်းၼိူဝ် ၼႂ်းၸိုင်ႈတႆး၊ တေတုမ်ႉတိူဝ်ႉၼႂ်းမိူင်းထႆး ၼႂ်းၸႄႈတွၼ်ႈၵဵင်းမႆႇ 1 ၸႄႈဝဵင်း ဝၢၼ်ႈၵူၼ်း 23 ဝၢၼ်ႈ၊ ၼႂ်းၸႄႈတွၼ်ႈၵဵင်းႁၢႆး 2 ၸႄႈဝဵင်း ဝၢၼ်ႈၵူၼ်း 80 ဝၢၼ်ႈပၢႆ၊ တင်းမူတ်းမွၵ်ႈ 13,000 မေႃႈၶဝ်ႈ၊ တႃႇပိုၼ်ႉတီႈတၢင်းၵႂၢင်ႈမွၵ်ႈ 47,000-48,000 ဢေႊၶိူဝ်ႊ (130,000 ႁႆႈ)။ တေတုမ်ႉတိူဝ်ၵူၼ်းမိူင်း ၸိူဝ်းႁဵတ်းၵိၼ်ၵၢၼ်ႁႆႈၵၢၼ်ၼႃး ၼႂ်းပွတ်းတွၼ်ႈၼႆႉၵူၺ်းပႆႇပေႃး တေတုမ်ႉတိူဝ်ႉပႃးၵၢၼ်တွင်ႈတဵဝ်း လွင်ႈပႄး (ၶီႇႁိူဝ်းၵႂႃႇမႃးၶိုၼ်ႈလွင်ႈ)ၸွမ်းမႄႈၼမ်ႉၵူၵ်း- ၼႆယဝ်ႉ။ ၵူၼ်းၸိူဝ်းယၢမ်ႈၵႂႃႇၽႅဝ်ဢွင်ႈတီႈသၢင်ႈၾၢႆလၢတ်ႈဝႃႈ- လွႆပူင်ႇတွင်း မီးၾၢႆႇၼိူဝ်သူပ်းယွၼ်း၊ ႁၢင်ႇယၢၼ် လႅၼ်လိၼ်ထႆးမွၵ်ႈ 30 ၵီႊလူဝ်ႊ။ တၢင်းၵႂၢင်ႈၼမ်ႉ ဢွင်ႈတီႈတေႁဵတ်းၾၢႆ မွၵ်ႈ 15-20 မီႊတိူဝ်ႊ၊ တၢင်းသုင်လွႆမွၵ်ႈ 80 မီႊတိူဝ်ႊ၊ လွႆသွင်ၾင်ႇ ႁၢင်ႇၵၼ်မွၵ်ႈ 150-200 မီႊတိူဝ်ႊ။ တေဢၢၼ်း ၵေႃႇသၢင်ႈၶၢဝ်းတၢင်း 5 ပီ၊ တင်ႈတႄႇႁူဝ်ပီ 2013 တေႃႇထိုင်ႁၢင်ပီ 2017 ။ မိူဝ်ႈလဵဝ် ၸၢင်ႈဝႆႉၸဝ်ႈပၢႆးမေႃ ၶိူင်ႈၸၢၵ်ႈၶႄႇ မွၵ်ႈ 500 မႃးႁဵတ်းပၼ်၊ ၵႃႈၶၼ်သၢင်ႈၾၢႆ လၢမ်းဝႆႉမွၵ်ႈ 400-500 လၢၼ်ႉဝၢတ်ႇ- ၼႆယူႇ။ ၾၢႆႇၼိုင်ႈတၢင်းၼိုင်ႈ ဢိင်ၼိူဝ်ၸုမ်းဝႃႉ-မိူင်းလႃး တၢင်ႇဝႆႉလွင်ႈပိူဝ်ႈတႃႇႁဵတ်းၾၢႆ/ ႁဵတ်းမိူင်းႁႄႈၸိူဝ်းၼႆႉသေ မိူဝ်ႈဢူးဢွင်ႇမိၼ်း [ၵႅမ်ႁူဝ်ပဝ်ႈ(မၢႆ 2) ၶွမ်ႊမတီႊၶိုင်ပွင် လွင်ႈငမ်းယဵၼ် ၸိုင်ႈမိူင်းႁူမ်ႈတုမ် (UPWC)] ၵႂႃႇယဵမ်ႈမိူင်းလႃး တင်းၼႃႈလိၼ်ဝႃႉ မိူဝ်ႈၼႂ်းလိူၼ်ၻီႊသႅမ်ႊၿိူဝ်ႊ (2012) ပူၼ်ႉမႃးၼၼ်ႉ တၢင်း ဢူးဢွင်ႇမိၼ်း ၵေႃႈလၢတ်ႈဝႃႈ- ပေႃးၵဵဝ်ႇ ၵပ်းလွင်ႈႁဵတ်းၾၢႆၾႆးၾႃႉ/ ႁဵတ်းမိူင်းႁႄႈၼႂ်းပိုၼ်ႉတီႈသူၸဝ်ႈ ၵုမ်းဝႆႉၼႆႉ ႁဵတ်းသၢင်ႈၵႂႃႇလႃႈ- ဝႃႈၼႆ။ Thai people protest coal project ၵူၼ်းမိူင်းၼႂ်းၸႄႈတွၼ်ႈၵဵင်းႁၢႆး သၢၼ်ၶတ်းၶူင်းၵၢၼ်ထၢၼ်ႇႁိၼ် ၵႃႈပူၼ်ႉမႃး ၵဵဝ်ႇၵပ်းလွင်ႈမႄႈၼမ်ႉၵူၵ်းၼႆႉ ယွၼ်ႉမၢၼ်ႈၶိုင်ႁဵတ်းၶူင်းၵၢၼ်ထၢၼ်ႇႁိၼ်/ၶုတ်းထၢၼ်ႇႁိၼ်သေ ယၢမ်ႈသၢင်ႈပၼ်ႁႃတေႃႇထႆး မႃးယဝ်ႉပွၵ်ႈၼိုင်ႈ။ ပူၼ်ႉမႃးမိူဝ်ႈဝၼ်းထိ 21/07/2011 မီးၵၢၼ်ၸတ်းပၢင်ၵုမ်တီႈၵဵင်းႁၢႆးသေ သၢၼ်ၶတ်း၊ တၢင်းထႆးႁၼ်ဝႃႈ- ပေႃးႁဵတ်းထၢၼ်ႇႁိၼ်တီႈမိူင်းၵူၵ်း၊ ၼမ်ႉထၢၼ်ႇႁိၼ်တေလႆလူင်းမႃး ၸွမ်းမႄႈၼမ်ႉၵူၵ်းသေ တေၵႂႃႇၶဝ်ႈမႄႈၼမ်ႉၶွင်၊ မိူၼ်ၵၼ်တင်းပွႆႇၵွင်ႉသႂ်ႇမႄႈၼမ်ႉၵူၵ်းတင်းၼမ်ႉမႄႈၶွင်။ ထႆးလၢမ်းဝႃႈ- ပေႃးႁဵတ်းၶူင်းၵၢၼ်ထၢၼ်ႇႁိၼ်တီႈမိူင်းၵူၵ်း ၶၢဝ်းတၢင်းၼိုင်ႈပီတေမီးၾုၼ်ႇ 1,500 တၼ်ႊ၊ ပၻႃႊ 102 ၵီႊလူဝ်ႊ (တေၶႃႈတူဝ်သတ်း/ၵူၼ်းတင်းၼမ်)၊ ၵၢတ်ႊသ်ႁိူၼ်းၶဵဝ် (Greenhouse gas) 29 လၢၼ်ႉတၼ်ႊ။ ၼွၵ်ႈသေၼၼ်ႉ မီးဢၢႆယၢမ်းၵၢၼ်ႉ (Sulphur dioxide) လႄႈ ထၢတ်ႈၼၢႆႊၻရူဝ်ႊၵျိၼ်ႊ ၻၢႆႊဢွၵ်ႊသၢႆႊ (Nitrogen dioxide) လၢႆမႄႊၵတၼ်ႊ- ၼႆယဝ်ႉ။Wednesday, 06 February 2013 17:05 တၢင်းထႆး မႆႈၸႂ်လွင်ႈၾၢႆၼမ်ႉၵူၵ်း၊ ဢၼ်ၸုမ်းဝႃႉတေၵေႃႇ သၢင်ႈ ႁဵတ်းၶူင်းၵၢၼ်ၾၢႆၾႆးၾႃႉႁႅင်းၼမ်ႉၼိူဝ်မႄႈ ၼမ်ႉၵူၵ်း တီႈပူင်ႇတွင်း၊ ၼႂ်းၸႄႈတွၼ်ႈမိူင်းသၢတ်ႇ။ ၵွပ်ႈႁၼ်ဝႃႈ တေတုမ်ႉတိူဝ်ႉလွင်ႈယူႇသဝ်းၵိၼ်သၢင်ႈၵူၼ်း မိူင်းထႆး။ SOURCE-PANGLONG

ၵူၼ်းဝၢၼ်ႈၺႃးၸၢၵ်ႇပေႃႉထုပ်ႉ ယွၼ်ႉသိုၵ်းမၢၼ်ႈယိုဝ်းၽိတ်းၵၼ်တၢႆ ၵူၼ်းဝၢၼ်ႈပွတ်းမိူင်းငေႃႉ ၺႃးၸၢၵ်ႇတိၺွပ်းပေႃႉထုပ်ႉ လူၺ်ႈၸိၼႄးဝႃႈဢမ်ႇပွင်ႇၶၢဝ်ႇ၊ ယွၼ်ႉသိုၵ်းမၢၼ်ႈ ၼင်ႇၵၼ်ယိုဝ်းၽိတ်းၵၼ်ပွတ်းမိူင်းငေႃႉ တၢႆၵေႃႉၼိုင်ႈ၊ ပႃႊတီႊသိူဝ်ၽိူၵ်ႇလႆႈၵႂႃႇၸွႆႈလၢတ်ႈဢဝ်။ တပ်ႉသိုၵ်းမၢၼ်ႈၼေႇပျီႇတေႃႇ ပူၼ်ႉမႃးမိူဝ်ႈဝၼ်းထိ 14/01/13 ယၢမ်းၵၢင်ၶမ်ႈ သိုၵ်းမၢၼ်ႈတပ်ႉၶမယ 502 ယိုဝ်းၽိတ်းၵၼ် ပွတ်းဝၢၼ်ႈတိၼ်ၵႆႇ (ယၢၼ်ၾၢႆႇတူၵ်း ၵိင်ႇၸႄႈဝဵင်းမိူင်းငေႃႉ 8 လၵ်း) ၸႄႈတွၼ်ႈၵျွၵ်ႉမႄး ၸိုင်ႈတႆးပွတ်းႁွင်ႇ။ ပၢင်တိုၵ်းယိုဝ်းၽိတ်းၵၼ်ၼႆႉ သိုၵ်းမၢၼ်ႈၸၼ်ႉႁူဝ်သိုၵ်းလူင် (သၢမ်မႆ) တၢႆၵေႃႉၼိုင်ႈ- ၼႆယဝ်ႉ။ လွင်ႈတၢင်းဢၼ်ပဵၼ်ပၢင်တိုၵ်းၼႆႉ ႁူဝ်ႁႅၵ်ႈမၼ်း ၶမ်ႈၶိုၼ်းဝၼ်းထိ 14 ၼၼ်ႉ မီးၵူၼ်းဝၢၼ်ႈၵႂႃႇသူၼ် တႆႈၾႆးၵၢၼ်ႈၶႄႈ ပွၵ်ႈႁိူၼ်း၊ သိုၵ်းမၢၼ်ႈၸုမ်းတူင်ႉၼိုင်ႁွတ်ႈၽႅဝ်ၼွၵ်ႈဝၢၼ်ႈသမ်ႉႁၼ်လႄႈယိုဝ်းၵွင်ႈလွၵ်ႇၵူၼ်းဝၢၼ်ႈဢၼ်တႆႈၾႆးၵၢၼ်ႈ ၶႄႈပွၵ်ႈႁိူၼ်း။ ၽွင်းၼၼ်ႉ သိုၵ်းမၢၼ်ႈၸုမ်းဢၼ်မီးၼႂ်းဝၢၼ်ႈသမ်ႉထၢင်ႇဝႃႈ ပိူၼ်ႈယိုဝ်းၶဝ်ၼႆသေ ယိုဝ်းသႂ်ႇၸုမ်းၼွၵ်ႈ ဝၢၼ်ႈၶိုၼ်း- ၼႆယဝ်ႉ။ ပေႃးႁူႉဝႃႈသွင်ၾၢႆႇပဵၼ်သိုၵ်းမၢၼ်ႈၼင်ႇၵၼ်ယိုဝ်းၽိတ်းၵၼ်၊ သဵင်ၵွင်ႈယဵၼ်ၵႂႃႇယဝ်ႉၵေႃႈ ၵႂႃႇတိၺွပ်းဢဝ်ၵူၼ်းဝၢၼ်ႈ တင်းမူတ်း 7 ၵေႃႉ၊ ၸိၼႄးဝႃႈဢမ်ႇပွင်ႇၶၢဝ်ႇၼႆသေ ပေႃႉထုပ်ႉၵုမ်းၶင်ဝႆႉၶၢဝ်းတၢင်းဝၼ်းပၢႆ။ ၵႅမ်ႁူဝ်ပဝ်ႈ ပႃႊတီႊသိူဝ်ၽိူၵ်ႇ ၸၢႆးသွင်သီႇ၊ ၽွင်းတႅၼ်းၸႄႈမိူင်း ၸၢႆးၶမ်းၵျေႃႇ၊ ၸၢႆးတၢၼ်းမွင်ႇ လႆႈၵႂႃႇၸွႆႈလၢတ်ႈသေ ၵမ်ႉဢွၵ်ႇမႃး။ ၵွပ်ႈၸိူဝ်းၶဝ်ၺႃး ပေႃႉထုပ်ႉႁၢဝ်ႈႁႅင်းဝႆႉလႄႈ လႆႈသူင်ႇယူတ်းယႃတူဝ်တီႈ ႁူင်းယႃၵျွၵ်ႉမႄး၊ တေႃႇထိုင်ဝၼ်းထိ 22/01/13 ယင်းပႆႇလႆႈဢွၵ်ႇ ႁူင်းယႃ- ၼႆယူႇ။ ၽွင်းတႅၼ်းပႃႊတီႊသိူဝ်ၽိူၵ်ႇၵေႃႉၼိုင်ႈလၢတ်ႈဝႃႈ- လွင်ႈပူၼ်ႉပႅၼ်သုၼ်ႇလႆႈၵူၼ်းမိူင်းၼႆႉ တေတၢင်ႇထိုင် ၸၼ်ႉပႃႈၼိူဝ် ဝႃႈၼႆလႄႈ သိုၵ်းမၢၼ်ႈၸိူဝ်းပေႃႉထုပ်ႉၵူၼ်းမိူင်းၼၼ်ႉ ၵႂႃႇယွမ်းတူတ်ႈတၢင်းၽိတ်း တီႈပႃႊတီႊသိူဝ်ၽိူၵ်ႇလွင်ႈလႆႈႁဵတ်း ၽိတ်း- လႆႈႁူႉၼင်ႇၼႆ။

တိုၵ်းသူၼ်းၵူၼ်းမိူင်းမၢၼ်ႈ ႁဵတ်းဝႂ်ထုၵ်ႇမႅၼ်ႈၸွမ်းမၢႆမီႈထႆး Tuesday, 22 January 2013 16:36 ပၢင်လူင် လုမ်းၽွင်းတၢင်မၢၼ်ႈမိူင်းထႆး (မိူင်းၵွၵ်ႇ) ပိုၼ်ၽၢဝ်ႇ ပူၼ်ႉမႃးမိူဝ်ႈဝၼ်းထိ 18/01/13 ႁႂ်ႈၵူၼ်းမိူင်းမၢၼ်ႈ ၸိူဝ်းၶဝ်ႈႁဵတ်းၵၢၼ်မိူင်းထႆး ႁိပ်ႈႁဵတ်းဝႂ်ၸွမ်းၼင်ႇထႆး ယိုတ်ႈပၼ် ၶွပ်ႇၶၢဝ်းယၢမ်း။ ႁႅင်းၵၢၼ်တႆးၼႂ်းၵဵင်းမႆႇ ၽွင်းႁဵတ်းၵၢၼ်တီႈၼိုင်ႈ 1.ၵူၼ်းမိူင်းမၢၼ်ႈၸိူဝ်းမႃးယူႇသဝ်းႁဵတ်းၵၢၼ်ၼႂ်းမိူင်းထႆး၊ ပႃးၸဵမ်လုၵ်ႈဢွၼ်ႇယိင်းၸၢႆးၸိူဝ်းဢႃႇယုပႆႇတဵမ် 15 ပီ၊ ပိူဝ်ႈတႃႇႁဵတ်းဝႂ်ၵပ်းတူဝ်ၸူဝ်ႈၶၢဝ်း၊ ႁႂ်ႈယူႇသဝ်းႁဵတ်းၵၢၼ်ၵႂႃႇလႆႈၼႂ်းမိူင်းထႆးၸူဝ်ႈၶၢဝ်းၼၼ်ႉ မိူဝ်ႈဝၼ်းထိ 15/01/13 လူင်ပွင်ၸိုင်ႈထႆး လႆႈၸႂ်တူၵ်းလူင်းယိုတ်ႈၶၢဝ်းယၢမ်းပၼ် ၶၢဝ်းတၢင်း 120 ဝၼ်း။ 2.ၶၵ်ႉတွၼ်ႈၵၢၼ်ဢၼ်ႁဵတ်းသၢင်ႈယူႇယၢမ်းလဵဝ် ၶၵ်ႉတွၼ်ႈႁႅၵ်ႈ တင်ႈတႄႇဝၼ်းထိ 15/01/13 ထိုင်ဝၼ်းထိ 15/02/13 ၊ ႁႂ်ႈဢွၼ်ဢဝ်ၼၢႆးၸၢင်ႈ (ပေႃႈလဵင်ႉမႄႈလဵင်ႉ) ႁဝ်းသေ ၵႂႃႇလူင်းၸိုဝ်ႈသဵင်သၢႆမၢႆတီႈ လုမ်းၾၢႆႇၸတ်းႁႃငၢၼ်း ဢၼ်မီးၸမ် သုတ်းၼၼ်ႉဝႆးဝႆး။ 3.ၵူၼ်းမိူင်းမၢၼ်ႈၸိူဝ်းလူင်းၸိုဝ်ႈသဵင်သၢႆမၢႆဝႆႉၼၼ်ႉ ပိူဝ်ႈတႃႇဢွၵ်ႇပၼ်ဝႂ်ၵပ်းတူဝ်ၸူဝ်ႈၶၢဝ်းလႄႈသင်၊ ပိူဝ်ႈတႃႇဢွၵ်ႇဝႂ် ၸူဝ်ႈၶၢဝ်းပၼ်လုၵ်ႈဢွၼ်ႇယိင်းၸၢႆးၸိူဝ်းဢႃႇယုပႆႇထိုင် 15 လႄႈသင်၊ ၵႂႃႇႁဵတ်း(ဝီႊသႃႊ) ဝႂ်ၶဝ်ႈမိူင်း လႄႈဝႂ်ဢၼုၺၢတ်ႈ ႁဵတ်းၵၢၼ်လႆႈ တီႈၸဝ်ႈၼႃႈတီးထႆး 10 ၸႄႈတွၼ်ႈ၊ တေၶတ်းၸႂ်ႁဵတ်းပၼ်ၵႂႃႇ တင်ႈတႄႇဝၼ်းထိ 15/02-13 တေႃႇထိုင် ဝၼ်းထိ 15/05/13 ။ 10 ၸႄႈတွၼ်ႈ ၸိူဝ်းၵႂႃႇလူင်းၸိုဝ်ႈသဵင်သၢႆမၢႆလႆႈၼၼ်ႉ မိူၼ်ၼင်ႇသမုတ်ႊသႃၶွၼ်ႊ၊ သမုတ်ႊပရႃႊၵၢၼ်ႊ၊ ၵဵင်းမႆႇ၊ သုရၢတ်ႉထႃႊၼီႊ၊ ပထုမ်ႊထႃႊၼီႊ၊ ၵၢၼ်ႊၵျၼၿူႊရီႊ၊ ရႃႉယွင်ႊ၊ ၶွၼ်ၵႅၼ်ႇ၊ သူင်ၶလႃ၊ ၼၶွၼ်ႊရၢတ်ႉၶျသီမႃႊ ၸိူဝ်းၼႆႉ။ 4.ပိူဝ်ႈတႃႇႁႂ်ႈမီးဝႂ်ထုၵ်ႇမႅၼ်ႈၸွမ်းမၢႆမီႈထႆးၼၼ်ႉ ၵူၼ်းမိူင်းမၢၼ်ႈၶဝ်ႈႁဵတ်းၵၢၼ်ၼႂ်းမိူင်းထႆး ၸိူဝ်းၵိုတ်းလိူဝ်ဝႆႉပႆႇလႆႈ ႁဵတ်းဝႂ်လႄႈသင်၊ ယိင်းၸၢႆးၸိူဝ်းဢႃႇယုပႆႇတဵမ် 15 ပီလႄႈသင်၊ ႁႂ်ႈႁဵတ်းဝႂ်ၶဝ်ႈမိူင်း လႄႈ ဝႂ်ဢၼုၺၢတ်ႈႁဵတ်းၵၢၼ် ၶိုတ်းတၼ်းၸွမ်းၼင်ႇၶွပ်ႇတူင်ႇၶၢဝ်းယၢမ်းဢၼ်တတ်းမၵ်းဝႆႉ- လႆႈတိုၵ်းသူၼ်းမႃးၼင်ႇၼႆ။

မၢၼ်ႈတင်းလၢဝ်းတေႁူမ်ႈၵၼ် သၢင်ႈၶူဝ်ၶၢမ်ႈမႄႈၼမ်ႉၶွင် ၸဝ်ႈၼႃႈတီႈလူင်ပွင်ၸိုင်ႈမၢၼ်ႈ တင်းလၢဝ်းဢုပ်ႇဢူဝ်း ၵၼ် တူၵ်းလူင်းတေသၢင်ႈၶူဝ်ၶၢမ်ႈမႄႈၼမ်ႉၶွင် ပွတ်းၵဵင်းလၢပ်ႈ လႄႈၵဵင်းၵူၵ်း မိူင်းလၢဝ်း။